1. Оршил
Монголбанкны Мөнгөний бодлого, судалгааны газар Монгол Улсын нийгэм эдийн засгийн өнөөгийн байдал, банк санхүүгийн үйл ажиллагааны талаар 2009 оны 9 дүгээр сард олон нийтийн дунд зургаа дахь жилдээ санал асуулга явуулж, үр дүнг өмнөх онуудтай харьцуулан дүн шинжилгээ хийж та бүхэнд толилуулж байна. Энэ жилийн судалгааны ажлын онцлог бол 2008-2009 оны санхүү эдийн засгийн хямралын талаар иргэдийн санал бодлыг асуун нэгтгэн дүгнэсэнд оршино. Түүнчлэн, өмнөх онуудын суурь дээр тулгуурлан эдийн засаг, нийгэм болон банк, санхүүгийн гол асуудлууд дээр иргэдийн санал бодол хэр өөрчлөгдсөнийг динамикаар харуулсны зэрэгцээ судалгаанд оролцсон иргэдийг аймаг хот, нас, хүйс, боловсролын түвшин, ажил эрхлэлтийн байдлаар нь ангилан тус бүрээр нь тайлбар хийв. Мөн манай улсад сүүлийн жилүүдэд эрчимтэй хөгжиж буй бичил санхүү, жижиг дунд үйлдвэрлэлийн хөгжлийн талаар тусгай бүлэг болгон оруулж, дэлгэрэнгүй судалгаа хийлээ.

Төлбөрийн тэнцэл, гадаад худалдааны статистик мэдээллийн чанарыг сайжруулах ажлын хүрээнд Монголбанкны ерөнхийлөгч, Үндэсний статистикийн хорооны даргын 2009 оны 8 дугаар сарын 6-ны өдрийн 439/01/86 дугаар хамтарсан тушаалаар "Төлбөрийн тэнцлийг гаргах аргачлал"-ыг шинэчлэн баталлаа. Энэхүү аргачлалд төлбөрийн тэнцлийн дансдын 17 нэр томъёоны тодорхойлолт, үйлчилгээний тэнцэлд хамрагдах үзүүлэлтүүдийн нарийвчилсан тодорхойлолт, төлбөрийн тэнцэлд хийгдэж байгаа залруулга, мэдээллийн эх сурвалжийн талаарх тайлбарыг тус тус нэмж орууллаа.